Nangin maw dei ilo ti ve sen chu??


slum_kids

January thla zing dei lai chu ieng dang dang nekin zana ei del lum zek ta sa ngeia zal vawng vawng neka tlang lem ding a um der naw ti inla chu ami amen pui nuom tam hleng antih. Chu taka inthawka zuk thoa hmai hang phia ha hang nawt hleu hleu el dam chu in vet sin, mani inhremnaa khawm capital punishment tling phak ani ti nuom pawl khawm um nuol ei ti ka ring bawk. January thla dei lai hin chu iengkhawm thaw tul um lovin nuom chen zal thei nisien ti hi vawisunni chena ka thunawn ala ni zinga ala ni pei khawm ka ring.

Tukum chu kum dang naw ang takin ka umna khawm a dei ve in ami hip ngawi ngawi el anih, ngaizawng in dit bek bek in hmangaitaka an inhip nawng ngawi, hmu pei umlo rak khawma in mel le in hnai a inthung ang el ani hmel ie.

Zingkar dar 7:30 chun zingkar zata ka mood suk off hlak tu chu a hun taka inphalamna hri der lovin a hungin ri rek nawl nawla, ri lai popoa chu ka ri nghawk tak ding, ka hla ngai pei naw tak, a ri sie tak le an ri ta chun a bula ka um sawt pei naw tak dinga hal nal naw bek bek chu ka alarm ri a dingin ka hmang ani bawk leiin a hungin ri chun chu in dan ding hi a um ta naw reng reng anih. Hang tho chu darker 7 zet dei leia inthin puma theory class le clinic class nei nawk ding, tho loa alarm hmet hlum chun hadam taka in nawk ber ber thei anachu attendance ngai pawimaw a tul hlak si lei chun tho nawk el a tul si. Del lum sa nekin zing dei tuor chun malsawmna an tlun lem lei chun kei pa lo tak khawm hi pa tehlem thawin ka lo tho nawk hlak chu ani hih!

Sunlam ding dinga tha in ka malpui hnungtieng hin khuoihli samtawk anti ang chi kha ala hung um nawk ta deu deu lem hin chu aw Lalpa Pathien, I naupa hi chu imi va hang hmangai em em de aw, a tul hun taka khuoihli te malsawmnan imi vura, Israel hai thlalera fak ding neiloa an in vak buoi laia an fak ding manna I pek ang el khan kei khawm dei leia ka zing tho pei naw hi hriin khuoihli samthawk imi pek leiin I kuomah lawmthu ka hril che ka ti nuom deu thaw chu tie.

Sienkhawm ka hangin ngaituoa thaa, Gauhati anthawk ka hung kir zana bus tukver inthawka ka zuk hmu thei, zan dei laia lam sira naupang inthuom lum na ding mumal neiloa in thung khawm, nu le pa an nei dim chu thudang, dei em ema lam sira hmun hnawk rawa alo awia in thin hawp el, riekna mumal an nei naw ding zie chu an thuomhnaw lum neinaw dan anthawk khawma hriet thei le hmu thei. Ka lungril mithla an hungin lang zet chun kei khuoihli samtawk suonlam leia lo la zal tum pa hi chu ka nep em el tiin kei le kei kan per thoa, chu nia ka class lak chu thaw tha kan ti khawpel.

Eini rawi nu le pa, u le nau mi sawm dawl thei tu ding, thlasik laia inlum, in thuom lumna ding huntawk le puonlum hun tawk nei haiin ei nitin nun khawsak ei lo hril chier ve sen hi chu aw ami siemtu lungril chu ei suk awi zo zai dim..ei tawngtai hlaka ei lungril popo chu kahaseh! lawmthu chu thudang, ei hni thei popo ei la hang hni sa lem nawk lawi si..hmasiel tawp khawk el, Pathien in hieng chen chen mi lan dam tira mi harsa le pasei hai ngirhmun hri pei thei dinga ami lan dam ti hi chu ei vangnei ani aw. Ani rawi chu an lum zo nawk baka an fak ding le an nitin khawsak dan ding ani sengin an lan ngaituo fawma, khawvel harsatna nasatak kara nang le kei ang chara dei le lum kar hlat zie hri ve, nei le nei naw kar hlat zie hri phak ve, hmeltha le tha naw hri bawk, dei laia pun lum le zakuo lum haia in thuom lum nuom ve em em, lum laia fan hnuoia hadam taka zala mangtha taka nei nuom ve tho…I vangnei zie hi I ngaituo hlak am?

Eini rawi chu aw, zakuo thu li thuo nga ei in bel hnung khawma min dei anti leia dei dema lo ha rawt ve pawl mei mei hai, bakil/sam khitna le puon sil in match naw lei ringawta chier in tluok vel mei mei hai, zantina apangai ngawt jacket hak leia nu le pa hai kawla nuor thusim in zawt hmang hai, ngaizawng hai ep nuom luot leia nal tum nawk taluoa nei sasaa thuomhnaw hak rawn nuom lo hai. Ngaituo chun ei vangnei nawk taluoa ei pasie ei lo sawn ku hi ei lo hausa taluo lem ani hi tie. Anni rawi ang chara hringnun khawsa ding niinla chu aw, kei in surrender hmasa tak ka ta a dawta chu a tiem mek tu hi ini el thei ani aw, fairela bu um zing hman suong pei lo, huona nu le pa hai thaw suoksa thlaihna zen,sawp fai le suong pei lo bawk chun ani hai ngirhmuna lem chu khawlam dei lai lai thuohmhnaw lum bo bawk chun I fak ding pawisa boin I zawng ding? Kei ka mimawl ngaituona chun ka zawng dan ding ka ngaituo phak naw tieng deu anih!

Pathien malsawmna changtu le a ditsak biek hai eini leiin ei nei le ei thei na senga Ama inpaka chawimawi ding baka ei hringnun hi fimkhur nawk zuola ei hmang hi a pawimaw tak zet anih. Chu chu ei thil thaw ding awm reng khawm anih, ei nitin khawsakna innghaktu, fak zawngtu, vai rama college kai tu le office kai hai hi zu le sa chena dourap mei mei ding eini naw tawp el anih. Ei khawsak ngaituoin dit le dit naw khawm sai kar thei lo dei lai le nipui lum khawma an harsatna a um pangaia chenchil zing tu, hringnun hmelsietna abawm kumkhuo hai hringnun ngaituoin ei vangnei zie in hri thar mawl inla. Chu hriet thartna chun eini rawi mawlna khur thima lo pil vang vang ta hnung hai, ru tawl in thung khawm ang ela dei tia lo in thin hawp rawk rawk hai hi har tharna revival in mi hung nuoi vel sien chu chun ei ram, ei hnam, ei khawtlang le sungkuo nuna hausakna Ami pek bel san aw dim anih? Chu hma po halk chu hnam dang hai inhnar na in dei tiin mi lai khawm changpar ngam loin eiin thin ngat ngat chu a tul ding ani hmel hih!

Jonathan Lalthanglien Inbuon
Jorhat, 6th January, 2013

3 thoughts on “Nangin maw dei ilo ti ve sen chu??

  1. Ziek tha rek ngei de, phalbi lai hin chu mei lum, khum del sa hai ang lum hi pathien thu nekin awi an hoi lem khom a ang ie mo hihi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s