Ka ta ngeiin in chang la..


really final

“when you really want something, the whole universe conspires to help you” -Paulo Coelho (The Alchemist)

Ka in kar chun ka room a chun envelope ka room mate pa chun ka table a inthal balin alo sia, zantieng round hun vela ka thang har hnung chun ka hmu choa, ring lo der chun Rani Bagan, Basistha Road, 3rd Byelane, Guwahati, Assam-781028 anthawk an lo hung thawn chu alo ni zing si. Regional Passport Office, Guwahati hai mi thawn ani ti ka hriet char chun ka zuk hawng sawk sawka, ka passport apply an mi reject rek manta ding chu aw tiin. Sienkhawm ka zuk hmu chun ka passport apply ka kut ngeia ka hang chawi el thei lei chun hlim le lawmin ka en vela, ka thlalak in fuok lo tuta ka ngai bel dinga ka lo submit sa khawm chu a nalin ka lo tha ver ver ve khawpel tiin ka drawer a chun en nawk dingin kan sim san sawk sawk lema.

Ka bike chuong khawm chu hri fu mang lovin ka lo beisei ram le ka tum ram chu ka tlung mek anta hi tiin gear pui ngatin, petrol hek le man to khawm ngaituo lek lovin a lawmnan hospital tieng chun ka tlan phei a. Mak danglam takin ka round na ding ward ka tlung chun ka damnaw hai popo chu an lo umnaw vawnga. Nurse lo duty hai chu thil umzie in dawnin ka hang biek vel khawm chun ami dawn nuom reng reng anlo um der dal si. Nurse te te, in sin thaw that leiin ‘Florence Nightingale Medal’ vawi lakh zathum dawng inla khawm doctor a promotion hmu phak teu teu lo ding cheu, inin ti thei vela tia ka hrang khum khawm chun an mi pawp sa rak naw lei chun damnaw inrik an um chun nangnin lo buoipui inla damdawi lo in chaw ro tiin eltam deuin nurse ruol chu ka suoksan tawl deia.

Ka damnaw enkawl suna ka en, zatienga ka round phaa ka en nawk ngei dinga kan tiem chu zawng hmu ngei tumin ward dang a hai chun ka en vela, kan suok tir khawm ni si lovin register a chun discharge tiin alo in ziek bawk. Thil mumal lo tak chu a um ani ngei hi tiin ka tlunglu chu a buoi ngei el ie.

Ka zawng tak hlak umlo tiin ka umna chu ka pan nawk a. Iengkhawm thaw lo chunk a zal lema. In thei naw leiin ka email ka chek naw na a sawt ta leiin http://www.aol.com chu hawngin ka mail ka zuk en chun mail pahni hi an lo uma, ka zuk hawng chun ka resume ka thawn hai chu an lo pawm veve ani thu le ka hlaw ding le ka umna ding appartment hai aum sa ani thu hrilin an mi lo lawmlutna ani zing lei chun ka lawm bek bek ti baka chun kan chawm thoa, hnena ‘Hla Do’ ka la zukin sam tetea.

Pathien hi chu alo va tha de aw, ka class X, XII le medical entrance laia ka tawngtaina hai ka ngaituoa ka hni reng reng hi chu mi pek el baka beiseina bo der chun ami va si naw de aw tiin ka lawm na a zuola. Ka ring pa hi chu ring man um ava ni thlek tlek de awh.

Phu lo taka ka lo dit em em, ka medical college um sunga ka thi chil ngam ka ‘IJASSDIE’ ngam tawp nu hi nei thei ngei lang lem lem chu, khawvel hi chu ka ta ding chun paradise ani tawp ding anih. Tuhin chu ka sunghai zu biek that hun alo tlung anta. Ka nu le pa hlak chun mark 100 an pek sa, keiin ka dit na in a hne bawk leiin inzak khawm dawn lova ka facebook wall le ka status hai chena a thlalak le a hming ka post le ziek nu hi ani..nang ngei ngei hi ilo nih. Thenaw biethu in tiema run hmun khata hang leng kawp khawm chu hnuoi a ka beisei lai popoa a tawpkhawk ani thei ngat ding khawmin ka ring hiel. Hmangaina jail a intang, amin suo thei ding umsun chu ama nu hi ani hmel si, chu leiin hi thil hi ka suk puitling ngei hi ka thlarau le lungril ngaituona nuom pa tawp. Sienkhawm ala ni sin naw leiin beiseina neiin la tawngtai nawk tak tak a tul ding ani hi tiin, hmela hlima ruok tak neiin ka hun hmang chu inhawi ka ti hle.

Ka ta ngeiin in chang la chu ka va hlim awm de awh! Sydney Opera House le Kangaroo ena feng eita ei nu le pa hai ko thlang eita, hun hlim um tak an hril chu ei la hmang ve ding ani tia hmai sana zuk hril thei dam nila chu nidanga kan zak ang khan chu inzak der lovin a rap a zuk rap thla zawt zawt khawm kan zuom hiel.

Ka khata hi hringnun nel um lo taka, I thanglo bawka mi rama nang ngai bek bek zing bawka ka zuk hma suon ding nek chun fe naw tawp khawm ka thlang nuom el ani zuk ti sa thei lang lem chu iengtin am a mi ngai ding. Sienkhawm mi lungril hlak chu ei hriet thei vawng sin aw leiin hi hringnun harsatna lung awp-in-kai taka chun ka thla lut nawka.

Chu lai chun lir inhning ang el chun ka pumin thawk le khat lo chun ka hungin hning ta dur dur ela, ka mit hai ka suk meng har chun ka ruolpa insiem zo sa chun college fe ding ami hung kei tho chu alo ni lema. Heh! Ka manga lo ni zing an nawm ie! Room mate nei khawm nilo, passport lem chu chu ka nei naw sa ani chu tie tiin ka drawer a passport umlo khawm chu a umlo dan pangaia lo umlo zing dingin ka ha ka nawt san ta lema. An hawi lai tak chun imi hung kei thoa tia zuk hal khawm chu nuom hle lang khawm dar 7:30 alo in ri ta lei chun classs fe dingin kan siem lem taa.

Ka mang ang renga ka ziek hai hi ka thil tum a hun la tlung naw leia Pathien mi pek ding a mila pek lo hai dam, ka tawngtai na hla hai. Ringzo takle ei thil thawa takin ning taka ei hnia ei thaw chun mi pek phal naw a mi nei der anw zie chu kei ngei khawmin ka class X, XII le medical entrance kan chuk lai le kan buotsei lai khan chieng taka hri thei dingin vawitam tak a malsawmna ka lo dawn ve ta hlak. Chu chang nawk ding chun kei khawm thei tawp suoin ‘MINU’ lunglai kuoi ngei thei ding bawkin ei hei bei nawk ten ten chu ani hih. Harsa hle sienkhawm, chu hmuna ngei chun hmangaina, lawman le ngaingamna a um tlat leiin tiem chin tieng chu ka pan tawk tawk el anih!

Chu beisei ram mawl chu thlirin nitin rinumna kan ruolpui, mi maksanni neiin, beisei rama chun ka ta ngeia in chang hma po chu thununna hlaw a tul awm si maw??

“And now these three remain: faith, hope and love. But the greatest of these is love.”
-1 Corinthians 13:13 (King James Version)

(January 18, 2013 Thursday, Jorhat)

9 thoughts on “Ka ta ngeiin in chang la..

  1. Ka tiem phut hlimin titak deuin ka tiema a hnugin kan nui tak tak..ziek thiem tha ie. Story ziek khom thiem ngot itih. Imi hlem nal veng2 khopel hahahaaaa

  2. Kangaroo ena feng eita ti le a lim i sie khi ka ena, i tum ram a i hril chu Australia ani ding ani mo? 😉 Very neat, nice touch!!!!!

  3. Vara VartePa: A bul chun a tak an der naw tunam anti thei reng ding maw? A tawpa ka mang kha alo ni zing si 😀 Story hi ka lo ziek tum ngai nawa, la tum nawm ei nim..i lo tiem baka comment i hung pek hlak leiin ka lawm che 🙂

  4. Beulah Joute : Ang lo tak chun ilo tiem ve kek ani maw? Ka ziek hlim khawma kan nui ngat ngat reng anih..Manga chu changkang taluo si a taka chu changkang si lo..’Ka ta ngaia an chang hma po chu’ “hope for the best” ti ang deu khawm kha ahawi ie.. 😉

  5. Ziek tha naw de aw, talent tha tak ilo nei ruok ani zing ani hi mo? Hung bei nok pei ro..Ijass die?? tia inthawk khan i blog a i Ijassdie ngam top nu ding hi ka lo research ngat2 a ka la hriet el thei no nih lol

  6. Pingback: Thlang Tieng Nghain | Ijassdie

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s