Ka bansan thei lul naw che..


suggestbanner

A spark neglected burns the house – Leo Tolstoy

Kei neka meng sawt hi chu kan hostel a ngei khawm hin an um ngai nawa. Zing dar 4 vela kan hostel bula rail hungin ri thuk thuk hi chu kan hostel a khawm kei charin hri hlak mei ka tih. First year kanin chuok lai khan ka ruol haiin ‘Mid-Night Man of JMC’ an mi ti hiel hlak. Zuk uong pui he hu ding um naw de sienkhawm min title an mi pek ve chu tiin lawm deuin ka put ve hmak hlak. Tulaia ei society a ei thil chieng thing ve takel Doctorate degree siemfawm an in pek ang vela thing le umzie bo deu inden muta an hming hmaa an ziek hai ang chi le khawm hin in ang vang rawi naw nim.

Zan mengsawt hi chu zing tho intak le phak deua class fena cho an tlun thei leiin ka zing tho tawm zatin ka zan mengsawt hri in vawi dam thei lo hi tawngsie kan phur tei hlak. “I’d like mornings better if they started later” anti dam hi chu ka tlawp nawk thung hle. Hi zan mengsawt hri hi iengtika ka lo in vawi tan le iengtik huna ka lo addict ta reng am ani ding khawm ka hriet thei nawh. “Far khat khawm intem lo ava tha de naupangte hai in veng tha ro, a tirin inhawi awm takin inlang sienkhawm; intem a inhnik awm takin inlang sien khawm, far khat khawm intem lo ava tha ngei; naupangte hai inveng tha ro” tia kan naupanglaia, Naupang Sunday School inruolsiekna kan sak hlak kha zu le inrui theia ding choin ka lo in hmebel tir hlaka chu zan mengsawt khawm hi a tir chun pawi ti na um rak naw sien khawm a sawt a seia ding chun hri tha lo tak thi ngei ngeina tu ang tluk alo ni thei el awm hi tie. Iengkim hi chiek taka lo in enfel chu ava pawimaw de aw ka ti vawng vawng hlak..

Night class dam hi um el sien chu zingkar in hma kher khera class fe a tul dal ding bah. Sienkhawm zingkara inthawka tan ani tlat bawk si chulaia chun kai naw thei ani si naw leiin hmawlte a mit in kama meng fawm naw deuin in suk har fawmin class ei hei fea. Hotu haiin an thil lecture an mi heiin dawn fuok a ei hriet naw ni lem chun ei mengsawt chu chu ha rawt pum ngatin tie ei chier khum chu. Vawizan chu zal nghal ding ani ei hang ti deu tuna, sienkhawm a hun a hung tlunga zala mit hai hangin siema, kut hai ei hang tlep khawmin imu hrim intuo thei loin ei zal har deu deu lem nawk si. Lekha tiem hin ei imu a suok nuom tiin lekha ka tiem hlak chun ka khawvar nawk ding ani si, kan hnik tak kan chuok ani leiin ka hriet chakna hin ami hne tlat leiin leiin, hi hmuna ka umsung hin chu ka subject tiemin ka imu chu a suok ngai naw ding ani hih. Ka ta ding chun computer a hla ngaia in awiin tum kha a damdawi tha tak le a thawk hrat tak ani dei anih. Chu ding hlak chun Off-timer a um sin aw leiin ka computer siet kan lau ang reng bawk. Buoithlak thei bakel!

MIthen khat ta ding chun thil harsa lo em em hi keia ta ding chun Himalaya thlang kai intak ang thluk ani si. Hne thei lo suol eina um ti ang deu khawm khan i nawm nim, in hne thei tlat lo chu. Chris Rock in “People said, Never say Never..but hear me I’m saying NEVER!” alo ti khawm hi andik hmel khawpel. Thil thaw theilo ding le hne thei lo thil, ngaia ei nei el ta hai hi alo um ani. Mani ngaia thil harsa, awm le mawia in lang midang ta dinga thil harsa lo awm lo le mawi lo talu, tlangval nal vura inchei bau thu huma nunghak hma bula tawng zuk zuk chieng hai le hin an dang na a num rak dim anih?

An tin nawm, nunghak le tlangval mi neka tha met hai hin chu ngaizawng nei hi awlsam antia, an nuom nuom nei theiin an in ngaia, nei khawm chu lo nei thei rawi naw ni ham. Nuom ta phawt thaw hi mihriem ta dinga natna acute nilo chronic deua mani thi na ding le hmel hemna dinga lo in buotsei lawk na chu ani der el sia. Chu lei chun muom nuom thaw hi thil tha lo tak khawm chu ani na lai tak a um. An ngaizawng hai neka hmeltha deu hmu leia an ngaizawng hai zuk the nuom el pawl ang chi mihriem hai hi khawvela ka ti tawp, ka hnai ngam lo mihriem, ka hringnun lam hraw naa IED lo phum ruk tu ang ka ngai ve tlat. Chu ang mihriem vawisun ni chena ka la tuok naw khawm ku hi ka ngaizawng hmu zo naw lei khawm ani ve el thei anih. Hmeltha rak lo khawm hi eilo that na aum ve na lai tak ani awm chuh.

Iengkim hi chieng zawngsak thei vawng alo nih, ngaizawng a kawp a thua nei chieng, ringum thei derlo mihriem, one night stand mei meia hlim hlawp hnawt pawl le a dang dang hai khawm hi a bul chun iengma loa ngai thei vawng an nih. A tawpa nuhmei-pasal in zawng tul nawk eita, hmela buoi hai kha hmela an buoi zing ring a um ta sin aw leiin hmelsie deu hai khawm ei chan a hung that na lai tak a um ding ani awm hi. Chris Rock bawkin nuhmei upa deu pasal nei ding hmu zo lo haiin, “As long as he has a job and a dick I wanna marry him” anti ati dam hi nuizat um le tawng zawmaw zawnga lak lo ding chun umzie inthuk tak alo alo in phum ruk ran anih.

Hringnun mawi le inhawi deua khala mi hai ngainat hlaw nuom chun hieng a mi um dan le mi inhawi ti hai popo khawm hi thaw ve lova lampui danga kal pen maw hi a tul ve ding ani awm hih. Chu ding hlak chun thalai hringnun inhawi hringmi zaleng hai hril fak chu ei paw phak naw ding ani awm sia. Ieng po hai khawm hin an nini lo ni mei mei raw hai seh, Lal Solomon nuhmei 1000 chung nei hmana “Teplo hai teplo” alo ti hi a tawpa chu ani vawng tho leiin a equation result chu NULL tho ani ding anih.

A tawp tak na a ding chun, ei nuom dan dan le inhawi ei ti dan dana hringnun khal theina permit insang tak pek ei ni seng a, khawlai ram le hmun am eiin khal tlung ding ruk chu ei khawsak dan in hril thei mei ati. “I thaw rak le marak fang I ta, I thaw dawl le dawl fang I tih” ti ang deu khan, ei hlim thla hin ei damsung ami zui ngat ngat awm sia. “Hnap thla per pura kan rui khawmin, ka bansan thei naw dawn chi hi” ti hla cheiin a um ani kha. Eiin sir ta bek bek hnung khawma ei bansan thei naw hai hi chu ei chieng zawngsak hma khan lo thaw naw el inla chu niding ana, chu ding hlak chun a hriet an tak si, hmeltha le mawi deuin an lang hlaka, mitin in thatna, mawina le hausakna hai neka hnawt tak ei nei sin aw leiin chu lemderna chun ami dawi vet pha le a sala intangin suok thei ta ngai lo reng reng dingin ami lo kal khum hlak ani hi tie. Ka tia chu kei khawm ku hi mengsawt chau ani der le ka chieng zawngsak hi BLOGGING khawm ku hi iengtika ka lo addict nawk tan??

(Jorhat, 1st February, Friday, 2013)

4 thoughts on “Ka bansan thei lul naw che..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s