Thi le thi; Dam le dam!!


Oath Taking by the 1st batch of medical student, JMC&H, 2010

Oath Taking by the 1st batch of medical students, JMC&H, 2010. . Me, inside the red circle !!

I don’t ask much, I just want you – Ozzy Osbourne (I just want you)

Ka piengthar thei naw talu beidawn, Manipur class X board exam ding tawm nawk nghala lungawp in kaia sandamlo ti inhri kur bawka sandamna ka hang zawng lai khan suol in hri thei tlat lo chu, lungril chu anntar ngei ie. Ka ruol haiin lekha an tiem mep mup zing laia keiin Rom bung 6 vel ka hang tiem el kha chu vanram le meidil in angnaw dan anga in angnaw ni mei atih. Rev. Ngamlalchawl in, “Jonathan hi chu a mihriem nina hin I tha ve ringawta, lekha I thiem thei thoa nang chu I thatna leiin Vanram khawm I kai el thei anii” tia fiemthu titaka ami sawisak khawm kha ka na a hin ala cham zinga hlak.

Pathien khawm a um ring talo deu thawin, sandamna pawimaw zie le titna chu nei siin. Thlatu bul leia suol, Pathien le inrem thei ta lo kan ni chu an ka lungril le ka mawngkuo ka zuk zawn khawma hri thei der lo. In ruithei: hmuom chi, fak chi le dawn chi tak ngiel khawm vawisunni chena lan tem ve thak lo ta ding khan chu khang laia Eden huona Adam le Evi  theira lo fak leia ei zuk suol ve na ding san kha chu ka hriet thei naw reng reng ani deu tak kha ie. Ka tawngtai beidawng talu in, “Aw Lalpa, ieng dang khawm ka hni naw che, min piengthar tirla thi tawp nghal khawm ka nuom ka lo ti hiela.” Piengthar kha chu ka lo va zuk nuom ngat ngat!!

Keiin inrui thei ka thaw naw lei elin suollo anga ka lo in ngai khawm kha, suol lien tak ani der si. A tawp tawpa Imphal a medical entrance dinga coaching lak a ka um lain Pathien in mak danglam takin sandam ka ni zie le anau ka ni zie amin hriet tir hnung chun ka buoi nawk ta ngai nawa. Vawisunni chen hin khawlai khawm um lang ka thi hun huna chu vanram ticket nei sa le chu hmun thlir dek puma hringnun hmang ka lo ni zing lem antah.

England Lal ropui, Edward VIII na in, vawihnina nuthlawi ding mek a ngaizawngnu Wallis Samsons leiin a lalram a chan pha der leiin, “Aw! Hmangaina  avan thuk ngei!” ei zuk ti deu dawt ani ie. ! Ama in a lal nina a chan chu thudang a thla hai reng rengin England lalram a Lal nina an chang thei ta naw na ding chenin intiem kamna kekha, “INSTRUMENT OF ABDICATION” a ziek el khan chu, hmangaina baka Thi le thi; dam le dam ti ngei a ti ka ring. A nuhmei ding hlak chu thlawibuong, khawvela ka hmangai tak che, nang a neka hmangai dang mihriem an um nawh,  pasal pahni kawla lo in tiem kam ta sa. Ngai chu an den chi naw ngei el keia ta ding chun. Sienkhawm, England lalram neka Wallis Samsons a zuk thlang el na khawm hi hmangaina in dawivet na lei khawm chu lo ni naw nim maw? Tum a hri biek ei um chung leh.

Pathien in midang nau le midang nau in hmangai ding le inneia suongkuo indin dinga amin duong ani leiin, nuom le nuom naw thu khawm niloa minau hai ngei nuhmei-pasal a ei nei chu a tul ding si. Minau hai hlak chu an tam nasa rapthlak el si, a tu tak am ani ding? Tam hle hai sienkhawm pakhat chau ani ding si. Ei lo ngaizawng ta hai hlak kha ei nuhmei-pasal  ding tina ni lem lovin khawvela  ‘broken heart’ natzie le a umzie min hmutirtu ding le chu natna anthawka inchuka var dinga mi thangpui tu anlo ni lem si. Ah, iengkhawm an naw hih, innei hma naw chun tum ana hriet thei ani tak tak hmel naw hih!

Kei chu ka lo ti hlaka, tukhawm hin kala ti zinga, ieng eini naw laia mi hmangai tu hai neka mi hmangaitu hi chu khawvela mani suongkuo hai tiloa chu an um thei dim antah? Ei hmatieng thil hungtlung ding  hri der lova hmangaina leia thi le thi pui ding, dam le dam pui dinga ringumna a mi lo nghaktu chu sin neiin hung um lang, chu nunghak ta ding chun inro reng hi ka nei ka ring thei nawh. Chu ngei chu anih, ka duthusam hmangaina chuh. Chun chuchu thaibawia, nuhmei puonbil sawpa, nau hai puoka tarpu hai ina leng nawn deu zut khawm kan huom thak zak el awm ie.

Chung ang hringnun-hmangaina chun harsatna, beidawngna le pasietna haiin chawk buoi ve thei ta ngai naw ding ana. Hmangaina in tuom tlat hlak ata, inremna, inzatuona le inhrietthiemna ro a rel khum lem ding ani sia. Chung ang mihriem, thi le thi; dam le dam tia ngaizawng nei hai hrim hrim hi Pathien thu awia khawm a piengthar indik biek deu hai anni tei hlak. In awinaw chun kei hi mi lo en el ro :-D

Chu niloa suongkuo then khatin tlangval-nunghak an hausa lei ela an hang Pathein remruot tir fawm el hi chu ka pang an za deu tlat ani chu tie. Chung thaw pawl hlak chu in banglo, a pawinaw vawng ie, a tha ti el ding anih. Mani thatna ding le hamthatna ding seng zawnga dak fan vel mihriem eini sung hin chu a fair naw tak tak hi a um thei nawh. Hi hringnun a hin nuhmei ni kan chan sin chang hin chu ka sikhlim bawk a pur nawk sur sur hlak chu tie. A nuom pawl le ngaingam deua mi chanchin hri chieng bek lova lo zui nul nul dam ei la um nawk ta deu deu, Hmar a khawm Khawbung ka ni ala ti ta deu deu ti ang deu khawm kha ani hmel ta chuh. Invet a khawm a first degree certificate inhlan el chi ani tawp hmel. :-D

Khawvela thi rina ka rin laia pakhat chu ‘Arrange Marriage’ mawl hi. Hi hmangaina phuok fawma hin ka sunghaiin nuhmei min nei pal anti ti hi kan lau bek bek. Hieng hi chu vai le eini tribal naw hai ta ding, mani dit dan le ngaidan khawm hril thei lo dinga nu le pa char thuneina insunga dingin hang de hawn el ei tih. Ai-kuo-tawp-thang tak meu hnung khawma hmu zo naw talu beidawng suongkuo hai inbiek rem fawma ‘Love story’ siem nek hin chu “Kan thleirawl lai hmangai a khan lungawi mei ila” tia nuhmei nei lova pielral chena sak ngat ngat khawm kan zuom lem.

Pieng hun aum chun nuhmei-pasal innei hun khawm um ata, thi hun aum ding ang bawkin nikhat chu hmangaina tui fawnin ami lan tuokpui ni um bawk ati. Hieng thil tlung mek hai hi fiemkhur taka a ngaizawng nei tam zawng nilova a quality that zawnga Sura luthluok hi lo her mil vat vat a tul rawp ding ani awm hi. Ngaizawng nei ngam si chun innei khawm ama le ngam ngei ding, innei pui ngam naw ding chu in ngai pui lo el kha Sura nina einia inthawka ei peithlak thei sun, nisa thlak huna bu suong dinga thingkuong kher khera bu bel hai hang dawm kai ei bansan zie inentir na khawm ani hmel.

Chu nisi lova an hawi tak lem chu, a ruka an mi hriet si lova ei lova dit lai mama hi anlo in hawi. An mi hung message mei mei damin ei college kai dam, ei lekhatiem hai chen a suk hawi thei. Chung hai ang chun mi zuk ditin mi hmangnai ve el hai sien la lem chu khawvel a hin nuorna le pheng na ding um dingin ka hriet nawh. Sienkhawm ei nuom dan le ei theina leiin khawvel hi ei her vir thei si naw leiin; ei dit ta phawt ei nei thei naw ti hi chu a thara in chuok nilovin ei pal lai zing lem khawm ani el thei ani.

Ngaizawng nei haiin ngaizawng nei naw hai an inhnar angin a nei naw haiin a nei hai an lo inhnar ve sen khawm hi thil ni thei tak ding chu alo ni awm. Tum inhnar lem ding khawm ka hriet thei nawh, ka mawlna zawng tak ani. Sienkhawm kan hriet chiengna pakhat chu ka tita a chun ka thei tawpa ringum le kan tiemna sukpuitling ngei hi ka thil tum le ka lo thaw dan hlak ani leiin nei chun hmangai taka damsunga ka nei ngei thei ding ngei le kan in tawng mawl hi ka thlarau thlakhla bek bek chu ani.

Thi le thi; dam le dam tiin lanu chu hei biek tha dek dek ei ta, beisiena um le um naw chu eini a inthawka suok ding niloin amanu anthawka hmu ding lem cho ani si. Beiseina in hmatieng hri der lovin ei lungril popo in hmangaina inhlan tawp ani naw hlak chun ei nuhmei ding dam hi mi nuhmei in inching pal hlau ati ti inlau a um khawpel. Ka hmangai che ti bak chu hril le thaw thei a um naw leiin mi nanran kuoma pek phal lo le a biek cho ta dinga ei hmangaina chun a lunglai hang hne tum eita. Khawvela hin ieng dang khawm ka dit naw, nang ka dit tak el che anih tiin hang inhlan ei ta, ei lo hne naw khawma ei hmangai ani ti bek an hriet kha,  “Pawimaw full thrakss!!”

(Jorhat, 05th, 2013, February)

About these ads

10 thoughts on “Thi le thi; Dam le dam!!

  1. Piengthar thei no anthok in i trana..a topa nunghak alo ni rek zing si..i ziek kuol thiem rek khopel anachu Ka ta ngeiin in chang la kha chu a tluk naw deu hin chu :-)

  2. @Ruolngulworld thanks for LIKING this POST :-D

    @Lalremruot- kei kha thar thei der lo ang chi kha..mak deua thar tum..anachu ka ring neka lo awl el kha ani si..Tuhin chu Pathien zarin a nau ka lo ni zing kha ka ni zuol anih
    “Ka ta ngeiin in chang la” ti kha chu a hit met chu a ahawi ie maw? MI then khat khat in an ti tawl ngei hehehe :-)

    @Julie- Hriet chak hmel de ka hril el ding che mani aw heheheee ;-)

  3. Lalbieklien hla in “hope mitmeng um si lo chun” ti hla kha “I don’t ask much, I just want you – Ozzy Osbourne” nekin an hme lem el dim chu..tha reng 2

  4. @Lalhuoplien – Ka lawm ie..please visit again :-D

    @Huolngo – Ka piengthar thei naw thu ziek a tul bawk si leiin “Hope mitmeng um si lo chun” ti chu a Pathein thu le an mil naw zing laiin hmangaina thu ei zuk hril nuom zau bawk leiin “I just want you” ei zuk ti ni khi..Pathien thu le khawm an mil vang el thei..dit taluo leiin :-)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s