Thlang Tieng Nghain


final

GPRS Navigation Map: Direction from Jorhat to Gauhati and vice versa

“I find the great thing in this world is not so much where we stand, as in what direction we are moving.” ― Oliver Wendell Holmes Sr., Autocrat of the Breakfast Table

Sap tawng chun “East, West North, South” an tie la, eini tawng ve thung chun “Hmar, Sak, Thlang, Sim” ei ti nawk ang lawi si. Hi direction kawk hrilna hming hi sap hai chun ‘Cardinal Direction’an tih. Chiek taka ngaituo naw chun buoina ding a tam reng anih. East chu Sak ani dei si, West chu Thlang ani nawk bawk, North chu Hmar ani ngeia, chung ang bawk chun South khawm hi Sim tina anih. A tawng in nal zawnga hri nal pur hai chun hi thu le an hriet kawkan hmun hai hi buoi rawp mei antih. Ieng liea Sak, Thlang, Hmar, Sim ei lo ti el naw? Tlangtieng mi hai thil ei copy laia chu ei copy thel deu am ka ti ding, ka hriet dan indik naw lei lem. 🙂

Tulaia eini rawi: a tar, a nunghak-tlangval le naupang, kohran le ei society chena ei khawvel mi thuoitu le ei entawn tak chu tlangtieng mi hai khawsak dan le chet dan, a mawi le mawinaw, a tha le thanaw, thienghlim le thienghlim lo ani deu tak awm chu tie. Chung hai chu mani rem chang dan le mawi inti danin incheina le inthuoidan hai chena ei lo lak pei chu ani ta hi. Chanchintha min tlun tu khawm tlangtieng pasaltha ani leia ei zuk chawsang raka ei zuk copy-paste el am ani ta ding khawm ka zuk buoi vang anta ie.

Eini rawi chu mi copy chu ei hnesaw chi tak, an thana le an taimakna an takningna le teirei peina hai chu ani ani leia an thaw thei ding biek choa ngai thei khawp tawk chara mawlna in amin huol vel hai eini nei nawk si. Leilung indin tira inthawka hausa le ram changkang biek dinga indin anga ei ngai hai. An iengkim chu a tha tak pa le an hawi tak pa ni dinga ring tlat bawk si hai. An naw le ka hmu phak ve naw leiin anni lai khawm hin ram tawp, pasie le rethei um ve in TV a hai hin an lo thup hlak am ani ding? An lo um dinga si el ei tih.

Hienga copy-paste a eiin tawl pei chun khawlai ram amani chu eilan tawl tlung rawi naw mei nim. Chu hmuna chun inthuruolna le inlainatna, inhmangaina le tlawmngaina hai chu tienami hrilin lan hril eita. Tien laia ei pi le pu hai kha chu anlo tlawmngaia nang ruok chu I tanghma char ngaisak ding ani tiin ei nau haiin an nau hai bula la hril uor rak nawk nghal anta. Ei hmabak inthim tak eh! Inthim zing ta hi ei thla sawng ei nau pei hai ta ding chun tuta mani in bula um vai hai ei ngaisak naw ang char hin an hnam chipui hai le an lan ngaisak naw ve thei ani ti kha ei ngaituona mawl tak nei khawm inla, chu inrau sanna puonzar inzar khumna inlau na lei ringawt khawm chun phal naw hram inla. Harsatna sumpui inhlum let kara chen zing ni inla khawm mani seng bekin hnam a hin chieng inla, chu chiengna ngei chun, thudik le hnam ta dinga thil tha chu tan ngamna mi pe sien, ei hnam hi ala vul nawk ding an nawm.  Annaw si chun tuta inthawka kum 20-30 hnunga chu Hmar ti khawm hi nuizat um tawk chara hnam, mani u le nau hai le kara dolung le inral ring zing hnam, inthuruolna, tlawmngaina, inpekzona etc hai chu ei tienami ding an nawh tunam tin ngam ata? Chu lei chun lampui tha le ngil chu hraw tawk tawk tumin Pathien bel maw lei tieu.

Tulai a ka ngaituona hluo bit tu pakhat chu William Shakespeare, The Merchant of Venice ami, “The devil can cite Scripture for his purpose.” (Setan khomin a tanghma kei zawngin Pathien thu a changchawi thei) ti thu dei hi anih. Inthiem fawmna nuna ei in copy fuok kher kher hi chu bansan dan hlak a um ta si naw, hi natna damthei ta lo ding hin ei nitin khawtlang le inthuoidan hai chenin ami lo fak siet nastak zie hi a hritu mi tam tak um hai sienkhawm hri nuom der lova, mani thla la hung um pei ding hai tuorna/vaikvaina ding a chi the dartu le chu chi the dar mek hai chu an kak that thei dan dinga in fuoi pawrna nun in ami tuom vel lai hin mani tang hma seng zawnga indikna tehlema in huor khawm na hlak bo lo.

A tu tak chum ana Setan zuk tia thiemnaw in chang bur ding khawm ka hriet biek nawh. Mani senga ei nun khawsak dan le ei hnam a hminga ei nei ve, tlu sie vang vang chawi sangna chang hri naw naw chu a Setan chu eini ma naw hlak chun thafamkim le tlawmngai famkim in um bawk lo chuh. Hnam inthuruolna ding hum him na chang hri der lova nitin nun khawsaka mani tha ti dan le mani unau a hmu zing hai hni ngawi ngawi, na khawm na sit pek nuom loa lululna in suo chieng hai ta ding hin Pathien thu zuk changchawi pui rak ding a um dim chu aw? Sienkhawm, Setan meuin Pathien thua a tanghma kei zawnga lo changchawi pui ding a hmu chun eini rawi lem chun hmu em em eitih ti chu namen loin hei ring chawr el eitih. Chu lei chun Setan a lo in ngai dal raw uo (I ngirhmun en la chun ini na chu hri thei mei I tih). Mi tawng lak kawia a dang meta hem hlak chu ei til in thenna zawng tak ani nawk nghal leiin kei khawm ka tanghma veng kakin ka zuk ziek zau ani chuh..nui nui nui

Thlang tieng ngha bawkin ka lawng chungna hi uirokuilo tieng naw deua zuk hem lang. Khang ang em em tha zan lalnu sakhmeltha khan maw ka lungrila zuk lak ngat ngat el ta hi? A thatna le amizie hlak chu hril ruol loa dit um le ngainat um. Vantirko hnuoia hung tla pal, a thla siemthat peka vuong nawk nghal thei ding awm hmeltha le nal. Mak le mak ti talu kara nitin lawman chu hril seng si loin ka hringnun lawng hi ka lo khal der chu ani nawk anta hi tih.

Chawl kan nei meta Gauhati ka ti vet khawm ku hi thlang tieng, nisa thlakna tienga um ani chu thukhat nisien ka lungril le ka ngaituona, ka thil inchuk nasan tak umna khawm ani el thei ani. Khawm chu ka tanghma kei dek puma ka la zuk tuihni naw tawk tawk ani chuh. Thlang tieng ngaina le hringnun hmatieng ngaituo chang hin chuh, val lu inhai ram ram chang le lungrila inlau thawngna, chawm chawrawk chang khawm aum hlak hi tie, sienkhawm thlang tieng ngei hin nisa a lo thla hlak bawk leiin chuong lungril inrim ruokna hai chun thlak hmangin an nei ngei khawm ringna huoisen takin ka zuk ring chawr el anih. Chu ni, hlimna kawl hung eng dawk ve ni ding chu thlirin thlang tieng ngaingam takin ei ngha ani hih. Chu hma poa ding chun “Lalpa kut hratin mi chel zing sien, Hringkhuo tui ang dam sien; Malsawmna thar par mawi sawn ang tonin, Dar ang intong nawk ka beisei.” L. Keivom,  tiin zantin eiin mangtha el chu ala tul si maw? I lengna, thlang tieng nghain ei ta ding biek lieu lieuin, beiseina duthusam vawrtawpin “Ka ta ngeiin in chang la” ka la hung ti nawn nawk hlak. 😉

 (Jorhat, 4th March, 2013)

3 thoughts on “Thlang Tieng Nghain

  1. Phare phare… pakhat char zuk sawisel trat ka tih aw.. teimakna tia i ziek khi taimakna ti lem la indik lem mei a tih. ka lawm ie..

  2. Tulai a ka ngaituona hluo bit tu pakhat chu William Shakespeare, The Merchant of Venice ami, “The devil can cite Scripture for his purpose.” (Setan khomin a tanghma kei zawngin Pathien thu a changchawi thei) ti thu dei hi anih.

    Hi lai tak hi a thra ka ti 😉

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s